一上工就辭職，好少聽見，報界經典就係張健波多年前自《明報》返回老巢《信報》做總編輯，做咗一日就辭職，再返回《明報》做老總。現在有一宗就係一位程少泉先生到西九文化區管理局做行政總監（注意，不可誤會為行政總裁，雖則《南華早報》頭版標題係〈 Arts hub chief resigns〉），呢位程先生做過高盛、地下鐵、信和、迪士尼，照計行政經驗豐富，並非行事衝動之輩，何解會自願減薪過檔西九，上任一個星期後就鬆人？佢嘅書面解釋當然係冠冕堂皇，甚為公式化，但在個人 CV上，留下一大問號，以後再搵工，必定遭受獵頭族強力詢問及未來僱主查問，除非佢返番迪士尼、信和等公司啦。高級行政人員轉工，特別係高調轉工（如西九發新聞稿），最忌魯莽行事，給人一個不成熟，不深思熟慮嘅感覺，影響前途㗎！唔信就問吓獵頭高人。西九發展，可謂障礙重重，連鄭海泉在上海接受 now訪問，都以西九十年不上馬為例子，指香港發展受制於內耗，西九衍生咁多爭拗，當初源於文化觀念，地產是否凌駕文化，如何經營等等，想唔到推倒重來之後，聘請人手亦有如此多阻滯，行政總裁（ CEO）仲未請到，經程少泉一役，恐怕會嚇怕一啲有資格人士㖭。
雖然目前人浮於事，搵工不易，但徵聘高級人才，一啲都唔易，近日碰到一位著名榮休教授，問佢點解大學徵聘高級人士，如此困難，外國一流學者唔鍾意來港嘅？榮休教授話：「有兩點，立法會議員批評我哋人工太高，其實係無知。一般教授（助理教授、副教授，即以前之講師至高級講師）嘅薪水，無疑在世界上好有競爭力，但不至於高出市場，資深教授（即以前之 Reader及講座教授）人工就兩睇嘞，佢哋喺美國嘅薪酬加福利，大部份超出香港水平。此外美國大學冇退休制度，攞咗 tenure（終身職）嘅著名學者可以做到身體不支先至自動退休。我哋呢，退休年齡由五十五歲至六十五歲都有，試問一位學有所成，享譽甚隆嘅五十零歲講座教授級數人物，點解會嚟香港呀，除非係為咗回饋母校，回饋華人社會等特殊理由嘅啫！」哦，原來如此，照計人工好難向上調整，或者劃一將退休年齡提高至六十五歲，可延長至七十歲，但如此一來，年青有為博士又會抗議，總之頭痛！
沒有留言:
張貼留言